Direktivo Mühlemann

Pri la LingvoTesta Sistemo de la Esperanta Civito

Art. 1: Difino 

1. La Lingvotesta Sistemo de la Esperanta Civito (poste: LTSEC) estas transnacia testaro pri la scipovo de esperanto, inspirita de la Komuna Eŭropa Framo de Referenco por Lingvoj (Konsilio de Eŭropo, 2003-2020) kaj agnoskita de la Asocio de Lingvotestistoj en Eŭropo (ALTE, 2005).
2. La kvar fundamentaj karakterizoj de LTSEC estas:
     a) fokuso pri aŭtentaj ĉiutagaj situacioj;
     b) prioritato al la parolaj kapabloj;
     c) testado pri la lerteco de la kandidato utiligi la lingvon ene de la parolkomunumo;
     d) modelo de esperantlingvano kiu estas homo-sociano pli ol homo-asociano.

Art. 2: Ekskluziveco 

1. La diplomoj laŭ LTSEC (aŭ Civitaj diplomoj) estas la solaj agnoskitaj en la Esperanta Civito.
2. Kultura Centro Esperantista (poste: KCE) en Svislando estas la sola institucio kiu rajtas organizi lingvotestojn laŭ LTSEC, disdoni Civitajn diplomojn, fiksi la koncernajn kotizojn, kaj delegi al aliaj institucioj teritorie kompetentaj tiujn samajn rajtojn.
3. Ekde la aprobo de ĉi tiu direktivo la paktintaj establoj agnoskos nur la lingvotestadon laŭ LTSEC kiam diplomo estas necesa aŭ dezirata.
4. KCE kaj la institucioj delegitaj de KCE ĉesas organizi aŭ gastigi alispecajn lingvotestojn pri esperanto.

Art. 3: Ekvivalento 

1. Ĉiu persono posedanta diplomon pri esperanto, akiritan antaŭ la instalo de la unua ekzamena komisiono laŭ LTSEC, rajtas peti la ekvivalentan LTSEC-diplomon, kunsendante fotokopion de sia diplomo al KCE.
2. La ekvivalento por la plej konataj diplomoj en esperanto estas fiksita kiel sekvas:
   1. UEA/ILEI-diplomo (programo 1989): elementa = B.1; meza = B.2;
   2. diplomoj de Franca Esperanto-Instituto (programo 1966): atesto pri lernado: A.2; atesto pri supera lernado = B.1; atesto pri kapableco = B.2; pedagogia atesto = C.1; altaj studoj = C.2;
   3. diplomoj de aliaj Esperanto-Institutoj agnoskitaj ĉe la Akademio de Esperanto (aŭstra, germana, itala ktp): unua grado = A.2; dua grado = B.1; tria grado = B.2 (aŭ C.1 se ĝi kvalifikas por instruado);
   4. KCE-diplomoj: elementa = A.2; meza = B.2;
   5. ITK-diplomoj: alap/elementa = A.2; közép/meza = B.1; felsö/supera = B..2;
3. Se la diplomito havas du samnivelajn diplomojn el malsamaj institucioj, ilia ekvivalento estas unu diplomo el la tuj posta nivelo: ekz. du diplomoj B.1 (el la germana kaj el la franca institutoj) ekvivalentas al unu diplomo B.2 laŭ LTSEC.
4. Pri ne menciitaj diplomoj KCE decidos mem la ekvivalenton.
5. La ekvivalenton donas nur KCE, kontraŭ pago de kotizo, kaj ene de la Mutuala Rabata Sistemo se la diplomito havas la esperantan civitanecon.

Art. 4: Gradoj kaj niveloj

1. La gradoj elementa (A), meza (B) kaj supera (C) estas diferencigitaj laŭ niveloj en la sekva paragrafo.
2. La ses niveloj de LTSEC estas A1: enira, A2: fundamenta, B1: intera, B2: kapableca, C1: bakalaŭra, C2: majstra.
3. La nivelojn priskribas la tabelo 1.
4. Oni rajtas aliĝi al kiu ajn nivelo, eĉ ne havante diplomon.
5. Kandidatoj kiuj ne certas pri sia aktuala lingvonivelo laŭ KEFR, rajtas peti senpagan neformalan antaŭtestadon.

Art. 5: Testaj partoj

1. La parola parto antaŭas la skriban parton en ĉiu testo.
2. La parola parto distingas inter la parola kaj la aŭskulta segmento; la skriba parto distingas inter la lega kaj la skriba segmento.
3. Laŭ skalo de cent, la kvar segmentoj havas la sekvan pezon en la koncerna testo:
4. A1 – parola: 50, aŭskulta 20; lega: 20, skriba: 10.
     A2 – parola: 50, aŭskulta 20; lega: 15, skriba: 15.
     B1 – parola: 50, aŭskulta 20; lega: 15, skriba: 15.
     B2 – parola: 50, aŭskulta 20; lega: 15, skriba: 15.
     C1 – parola: 45, aŭskulta 10; lega: 25, skriba: 20.
     C2 – parola: 40, aŭskulta 10; lega: 25, skriba: 25.
5. La poentoj akiritaj en la unuopaj segmentoj estos indikitaj en la diplomo.
6. La testajn segmentojn priskribas la tabelo 2.
7. Scio pri socio – en ĉiu nivelo estos almenaŭ du demandoj pri la esperanta komunumo, ĝiaj kulturo kaj historio, kies komplekseco varios laŭ la nivelo mem.

Art. 6: Denaskulo

Rilate al esperanto, la nocio de native speaker ĉe la Konsilio de Eŭropo kaj ALTE, tradukita per la vorto “denaskulo”, ricevas la sekvan difinon: “praktikanta esperantisto kies hejma ĉeflingvo estis esperanto, kun funkcioj kaj eduka kaj identiga”.

Art. 7: Referencaj normoj

Por ĉio ne difinita per ĉi tiu direktivo oni aplikas la “Komunan Eŭropan Framon de Referenco por Lingvoj – Lernado, Instruado, Taksado” kaj la ALTE-normojn.

Art. 8: Apliko

La direktivon aplikas la koncerna reglamento.

Art. 9: Financa klaŭzo 

1. Ĉiu kotizo pro testo aŭ ekvivalenteco estas submetita al la Mutuala Rabata Sistemo (direktivo Hiltbrand).
2. La enspezoj pro la dismoj estas administrataj ĉe la Civita Banko.
3. Eventualaj kostoj pro la aktivigo de ĉi tiu direktivo estas kovrendaj per la sama konto ĉe la Civita Banko.

(aprobita de la Forumo la 22^an de julio 2006)
(reformita de la Forumo, en Pavio, la 29^an de decembro 2025)

Tabelo 1

Tabelo 2