HeKo 823 5-C, 17 okt 23
Okaze de la arĝenta jubileo de la Pakto la Civita “banko” nuligis ĉiujn ŝuldojn de afrikanoj pro mikrokreditoj, krom du. La ŝuldoj plejparte devenis el la aĉeto de libroj, kiujn ne ĉiuj partoprenintoj en Afrikaj Esperantologiaj Semajnoj (AfrES) pagis komplete al la koncerna konto en burundia bankofilio.
La antifeminisma politiko de la pola registaro, prezidata de Jaroslav Kaczynski, mobilizis virinojn baloti kaj kontribuis al la malvenko de la dekstrema kaj suverenisma partio reganta la landon jam dum ok jaroj. “Leĝo kaj Justeco” (PiS) restas la unua partio, sed perdis multajn voĉojn kaj tre malprobable sukcesos formi ankoraŭ novan registaron, certe ne unukoloran.
Kadre de festivalo pri historio, la Esperanto-Grupo de Bolonjo kaj Itala Fervojista Esperanto-Asocio organizas seminarion pri la temo “Kio okazis en julio 1980 en Raŭmo: esperanto inter fina venko kaj komunuma sento”, sabaton matene 21 oktobro 2023.
La rezulto de la baloto por la Parlamento de Slovakio konfirmas la dividon de Eŭropo en du frontoj diverĝe orientitaj kaj politike kaj more. Unuflanke situas la Uniemaj, aliflanke la EU-skeptikaj suverenemuloj. La unuaj subtenas la militan engaĝon favore al Ukrajno, inkluzive de embargo kontraŭ Rusio; la duaj bremsas pri tiu engaĝo kaj kontraŭas la embargon.
La estraro de la Universala, kiun la ĵusa kongreso en Torino premis al decido ene de malpli ol monato, prokrastadas la aprobon de AKSO, la grandioza retejo kiu kostis jam centmilon da eŭroj, plejparte pro salajro al unu persono.
HeKo 822 9-C, 12 okt 23
La Kapitulo de la Esperanta Civito kunsidis fizike en Rozoj 2-3 oktobro 2023, sub la prezido de la Vickonsulo, Giorgio Silfer. Senkulpiĝis la Konsulo, daŭre konvaleska. Alestis la Blanka grupestrino, invitita.
HeKo 822 8-C, 11 okt 23
Konsultinte la senatajn grupestrinojn, la Konsulo kunvokis la lastan sesion de la Parlamento dum la nuna mandato (finota en decembro 2024) al Budapeŝto por la pentekosta lundo, 20 majo 2024, koincide kun la 6a Danuba Esperanto-Rendevuo, organizata de la paktinta establo Fajszi Amika Rondo.
Pasintan sabaton tre multaj civiluloj, inkluzive de beboj, estis mortigitaj aŭ vunditaj en Israelo per subita agreso de Al Hamas, armita partio reganta en la enklavo de Gazao. Krome pluraj dekoj da nearmitaj homoj, inkluzive de infanoj, estis kaperitaj.
Danke al sia transnacieco ĉi-semajnfine Esperanta Naturamikaro povis partopreni en la internacia Asembleo de NFI en Stirio, pere de sia delegito Klaus Perko, dum la alia delegito estis blokita en Barcelono pro subita veturpaneo.
HeKo 822 5-C, 8 okt 23
La landnoma sistemo kreita de Zamenhof en 1887, kongrue al la mondodivido diplomatie fiksita en la konferenco de Berlino tuj antaŭ la Unua Libro (dua koloniisma epoko), aplikas jen “jus sanguinis” jen “jus loci”. La unua juro karakterizas Eŭropon kaj grandparte Azion (plus iomete Afrikon), la dua la ceterajn kontinentojn (kaj preskaŭ la tutan Afrikon).
La lasta tago de la dua NAKSE en Rozoj estis dediĉita al seminario pri bibliotekoj kaj arkivoj, sub la gvido de Bernhard Tuider, teamestro de Internacia Esperanto-Muzeo en Vieno, kaj de Ruben Fernandez, kiu ĵus liveris diplomdisertaĵon pri Centre de Documentation et Etude sur la Langue Internationale en Ĉaŭdefono.
Brilaj koncertoj en la kvina tago de NAKSE 2023: matineo de la klasika pianisto Giorgio Di Nucci kaj vesperumo kun la ĉiam eferveska JoMo, jam invititaj al la venonta Kultura Esperanto-Festivalo en Ĉaŭdefono, 5-11 aŭgusto 2024.
Giorgio Di Nucci alternigis katalunan repertuaron al polonezoj de Fryderyk Chopin, dum JoMo vervigis la etoson ĝis dancoj, kiuj envolvis la tutan publikon.
